Azərbaycan Respublikasının Rumıniyadakı Səfirliyinin təşkilatçılığı ilə Buxarestdə 28 may - Azərbaycanın Müstəqillik Gününə həsr olunmuş tədbir keçirilib.

Azərbaycan Respublikasının Rumıniyadakı Səfirliyinin təşkilatçılığı ilə Buxarestdə 28 may - Azərbaycanın Müstəqillik Gününə həsr olunmuş tədbir keçirilib.

 

Mərasimdə Rumıniyanın dövlət xadimləri, hökumət nümayəndələri, deputat və senatorları, ictimai-siyasi, elm və mədəniyyət xadimləri, bu ölkədə akkreditə olunmuş diplomatik missiyaların rəhbərləri, yerli KİV rəhbərləri, çoxsaylı türk və tatar icmasının təmsilçiləri, eləcə də Azərbaycan diasporasının nümayəndələri iştirak ediblər.

Tədbirin əvvəlində Azərbaycan və Rumıniyanın dövlət himnləri səsləndirilib.

 

Daha sonra səfir Qüdsi Osmanov çıxış edərək 1918-ci ildə yaradılmış Azərbaycan Xalq Cümhuriyyətinin tarixindən söz açıb, XX əsrin sonunda Ümummilli Lider Heydər Əliyevin dövlətçiliyin qorunmasında misilsiz xidmətlərindən danışıb. Azərbaycanın ərazi bütövlüyü və suverenliyinin bərpa olunduğunu, “Böyük qayıdış” proqramının Cənab Prezident İlham Əliyevin rəhbərliyi altında uğurla həyata keçirildiyini qeyd edib. Diplomat, həmçinin iki ölkə arasında gündən-günə genişlənən və dərinləşən çoxşaxəli münasibətlərdən bəhs edib, dövlətlərimiz və xalqlarımız arasında əlaqələrin vacibliyini vurğulayıb.

 

Tədbirdə çıxış edənlər,

Prezident Administrasiyasının Xarici Siyasət, Strateji Tərəfdaşlıqlar və Xaricdəki Rumınlar Departamentinin Prezidentinin müşaviri xanım Ana Birçal, Azərbaycan xalqını Müstəqillik Günü münasibətilə təbrik edib, rəsmi Buxarestin Cənubi Qafqazda davamlı sabitlik, inkişaf və firavanlıqda maraqlı olduğunu qeyd edib. O, 2022-ci ildə Avropada enerji böhranı təhlükəsi yaranarkən Rumıniya və Moldovaya verdiyi dəstəyə görə Azərbaycan dövlətinə və xalqına təşəkkürünü ifadə edib.

 

Baş nazirinin müavini və Rumıniya-Azərbaycan Parlamentlərarası Dostluq Qrupunun sədri Marian Neakşu, Azərbaycanın regionda mühüm rolunu vurğulayaraq Azərbaycanı Cənubi Qafqazda, Rumıniyanı isə Cənub-Şərqi Avropa regionunda ən mühüm dövlətlər adlandırıb. O, xalqlarımız arasında çoxsaylı bənzərliklərdən bəhs edib, Rumıniyanın Azərbaycanın Avropadakı həqiqi, etibarlı dostu olduğunu bildirib.

 

Rumıniya Senatının sədrinin müavini Mirça Abrudean, Rumıniyanın Azərbaycanın müstəqilliyini tanıyan ikinci ölkə olmasını, iki ölkə arasında strateji tərəfdaşlıq əlaqələrinin mövcudluğunu, bu sahədə imzalanmış müvafiq sənədlərin əhəmiyyətini vurğulayıb.

 

Rumıniyanın energetika naziri, Azərbaycan və Rumıniya Hökumətlərarası ticarət-iqtisadi əlaqələr və elmi-texniki əməkdaşlıq üzrə Müştərək Komissiyanın həmsədri Sebastian Burduja, ölkələrimiz arasında dostluq əlaqələrindən bəhs edərkən dahi Azərbaycan şairi Nizami Gəncəvidən sitat gətirib. O, Azərbaycanın apardığı enerji siyasətini “uzaqgörənlik hekayəsi” adlandırıb, yaşıl enerjinin istehsalı və Avropaya nəqli sahəsində əməkdaşlıqdan söz açıb.